सहारनपूर – उत्तर प्रदेशमधील सहारनपूरमध्ये एका स्थानिक पत्रकाराची लोखंडी रॉडने मारहाण करून हत्या करण्यात आली आहे. या घटनेनंतर दोन आरोपींना पोलिसांनी अटक केली आहे. पत्रकार सुधीर सैनी (Sudhir Saini) असे मयत पत्रकाराचा नाव आहे. कार ओव्हरटेक केल्याच्या वादातून झालेल्या भांडणात आरोपींनी सुधीरला लोखंडी रॉडने मारहाण केली. या हल्ल्यामुळे त्यांचा जागीच मुत्यू झाला.
पोलिसांनी पत्रकाराचा मृतदेह ताब्यात घेऊन पोस्टमार्टमसाठी पाठवला आहे. पत्रकार सुधीर सैनी हे सहारनपूरच्या कोतवाली ग्रामीण पोलीस स्टेशनच्या चिलकाना रोडवरून बाईकवरुन सहारनपूरला येत होते. तेथे सुधीरची ओव्हरटेकिंगवरून कारमधील तीन तरुणांशी बाचाबाची झाली. त्यानंतर कारमधील तरुणांनी सुधीरला मारहाण करण्यास सुरुवात केली.या मारहाणीत सुधीरला दुखापत झाली, त्यातच त्यांचा मृत्यू झाला. सुधीर सैनी यांच्या हत्येप्रकरणी पोलिसांनी तत्परतेने कारवाई सुरू केली. प्रत्यक्षदर्शींनी दिलेल्या कारच्या क्रमांकावरून कार थांबवली आणि कार ताब्यात घेऊन पोलिसांनी दोन आरोपींना अटक केली आहे.
पोलिसांनी मृत सुधीरचा पंचनामा करून पोस्टमार्टमसाठी पाठवून पुढील कारवाई सुरू केली आहे. एसएसपी आकाश तोमर यांनी सांगितले की, रोड रेजमध्ये पत्रकार सुधीर सैनी यांच्या हत्येमध्ये सहभागी असलेल्या जहांगीर आणि फरमान यांना पोलिसांनी तात्काळ अटक केली आहे.
