अहमदनगर : शहरातील कोठी चौकात दुचाकीवरून चाललेल्या दोघा मित्रांना टँकरने धडक दिली. या धडकेत एकाचा मृत्यू झाला तर दुसरा जखमी झाला आहे. गोपाल अभिमन्यू सोनवणे (रा. शेंडगाव, ता. श्रीगोंदे) असे मयत व्यक्तीचे नाव आहे. सुयोग शिवाजी शेळके (वय 21, रा. जुने दहिफळ, ता. शेवगाव) असे जखमी झालेल्या युवकाचे नाव आहे.
याप्रकरणी कोतवाली पोलिस ठाण्यात टँकर चालकाविरूध्द गुन्हा दाखल करण्यात आला आहे. जखमी सुयोग शेळके याने फिर्याद दिली आहे. गोपाल व सुयोग हे दोघे मित्र कोठी चौकाकडून मार्केट यार्ड मार्ग आनंदधामकडे जात असताना कोठी चौकाजवळ पाठीमागून येणाऱ्या टॅकरवरील चालकाने त्याच्या ताब्यातील टॅकरची धडक दुचाकीला दिली.
या धडकेत जखमी झालेल्या गोपाल व सुयोग यांना नगरमधील खासगी रूग्णालयात उपचारासाठी दाखल करण्यात आले होते. त्यातील गोपालचा मृत्यू झाला असल्याचे फिर्यादीत म्हटले आहे.
