अहमदनगर – घरासमोर उभा केलेला, इंधनाची वाहतूक करणारा टँकर मागे घेत असताना त्याचा धक्का लागून एक जण जागीच ठार झाल्याची घटना केडगाव परिसरात मंगळवारी (दि. १५) सकाळी आठ वाजेच्या सुमारास घडली. या प्रकरणी टँकर चालकावर कोतवाली पोलीस ठाण्यात गुन्हा दाखल करण्यात आला आहे.
शहादेव गहिनीनाथ दराडे (रा. काकडे मळा, केडगाव) असे गुन्हा दाखल झालेल्या इसमाचे नाव आहे. रामदास शंकर काकडे (४६, रा. काकडे मळा, केडगाव) यांनी याबाबत फिर्याद दिली आहे. फिर्यादीचे वडील शंकर जयराम काकडे हे सकाळी आठ वाजेच्या सुमारास फिरण्यासाठी निघाले असता आरोपी त्याच्याकडील टैंकर मागे घेत होता. त्याला हातवारे करून सांगत असताना वडिलांना टँकरची जोराची धडक बसली, त्यात ते गंभीर जखमी झाले, गर्दी जमल्याने टँकर चालक शहादेव दराडे पसार झाला, वडिलांना उपचारासाठी येथील जिल्हा रुग्णालयात दाखल केले असताना त्यांना डॉक्टरांनी मृत घोषित केले, असे फिर्यादीत म्हटले आहे.
