रीवा- मध्य प्रदेशामधील रीवा जिल्ह्यात आदिवासी अल्पवयीन मुलीवर तीन जणांनी सामुहिक बलात्कार केल्याची घटना समोर आली आहे. या प्रकरणात पोलिसांनी तीन आरोपींना अटक केली असून या आरोपींपैकी पैकी दोन आरोपी अल्पवयीन वयाचे आहे.
समोर आलेल्या माहितीनुसार १७ अल्पवयीन पीडिता चुलत भावासोबत जत्रेतून घरी जात असताना आरोपीने पीडितेचा अपहरण करुन तिला निर्जन जंगलात नेऊन तिच्यावर बलात्कार केला. पीडिता आरोपींच्या ताब्यातून रविवारी मध्यरात्री एकच्या सुमारास पळून जाण्यात यशस्वी झाली आणि तिच्या नातेवाईकाच्या घरी पोहोचली.
सोमवारी तिच्या कुटुंबीयांनी पोलिसांत तक्रार दाखल केली. या प्रकरणात मुख्य आरोपी असलेल्या २२ वर्षीय तरुणाला आणि १६ आणि १७ वर्षांच्या दोन अल्पवयीन मुलांना पोलिसांनी अटक केली आहे.
पोलिस अधिकाऱ्याने माहिती देताना सांगितले की मुलीच्या वैद्यकीय अहवालात तिच्यावर बलात्कार झाल्याचं स्पष्ट झालंय. दरम्यान, तिन्ही आरोपी आणि पीडिता एकाच आदिवासी समाजातील आहेत. घटनेनंतर मुलीच्या कुटुंबीयांनी मुख्य आरोपीला पीडितेशी लग्न करण्यास सांगितले, मात्र त्याने नकार दिला. त्याने नकार दिल्यानंतर पीडितेच्या कुटुंबीयांनी पोलिसात तक्रार दाखल केली, असे अधिकाऱ्याने सांगितले.
