मुंबई – शिवसेना खासदार संजय राऊत यांनी शिवसेना भवनात 15 फेब्रुवारी रोजी पत्रकार परिषदेत विरोधी पक्ष नेते देवेंद्र फडणवीस यांना मोहित कंबोज घडवणार असा विधान केला होता.
त्याच्या या टीकेला उत्तर देत भाजप प्रदेशाध्यक्ष चंद्रकांत पाटील म्हणाले की मोहीत कंबोज हे विरोधी पक्षनेते देवेंद्र फडणवीस यांना बुडवतील का? याची काळजी शिवसेना खासदार संजय राऊत यांनी करू नये. पण संजय राऊत हे मुख्यमंत्री उद्धव ठाकरे यांना घेऊन बुडणार हे मात्र स्पष्ट दिसत आहे.
चंद्रकांत पाटील म्हणाले की संजय राऊत यांनी काल(मंगळवार) पत्रकार परिषदेत सांगितले की, मोहीत कंबोज हे देवेंद्र फडणवीस यांना बुडवतील. याची काळजी संजय राऊत यांनी करू नये. देवेंद्र फडणवीस आणि आम्ही समर्थ आहोत. पण राष्ट्रवादी काँग्रेसचे अध्यक्ष शरद पवार यांच्या ‘पे रोल’वर राहून पवारांचा अजेंडा चालविणारे संजय राऊत हे अंतिमतः वाट लावणार आहेत व आपल्याला खड्ड्यात घालणार आहेत, हे उद्धव ठाकरे यांच्या लक्षात आलेले दिसत नाही.
तसेच त्यांनी सांगितले की, अडीच वर्षांपूर्वी संजय राऊत यांनी उद्धव ठाकरे यांना युती तोडण्यासाठी भरीस घातले. भाजपासोबतची युती तोडून काँग्रेस -राष्ट्रवादी काँग्रेसशी हातमिळवणी केल्यानंतर शिवसेनेने मुस्लीम मतांच्या मागे लागून आपला मूळ पाया संपविला. यामुळे आपल्याला मानणारी जनता तसेच आपले जुने नेते, कार्यकर्ते सोबत राहणार नाहीत, हे उद्धव ठाकरे यांच्या लक्षात येत नाही.
संजय राऊत यांच्या पोकळ धमक्यांना भाजपा घाबरत नाही. भाजपाच्या विरोधकांनी हे ध्यानात घ्यावे की, हा नवा भाजपा आहे. देवेंद्र फडणवीसांच्या निवासस्थानावर मोर्चा काढण्याचा प्रयत्न शंभर जणांनी केला. तर पाठिंब्यासाठी भाजपाचे एक हजार कार्यकर्ते पोहोचले. किरीट सोमय्या यांच्या हत्येचा प्रयत्न झाला, तर त्यांच्या समर्थनासाठी हजारो कार्यकर्ते रस्त्यावर उतरले. हल्ले कराल तर निराशेशिवाय काहीही हाती लागणार नाही. असंही चंद्रकांत पाटील म्हणाले आहेत.
