अहमदनगर – नालेगाव परिसरातील सीना नदीच्या नाल्यामध्ये एका अनोळखी व्यक्तीचा मृतदेह आढळून आल्यामुळे एकच खळबळ उडाली आहे.
याप्रकरणी कोतवाली पोलीस ठाण्यामध्ये अकस्मात मृत्यूची नोंद करण्यात आली आहे. दरम्यान कोतवाली पोलिसांनी मृतदेह बाहेर काढून जिल्हा रुग्णालयात शवविच्छेदनासाठी पाठविला. शवविच्छेदन अहवाल आल्यानंतर व्यक्तीचा मृत्यू कशाने झाला हे समोर येणार आहे. मृतदेहाची ओळख पटवून तपास करण्याचे आव्हान पोलिसांसमोर आहे.
नालेगाव परिसरातील नाल्यामध्ये अंदाजे वय ३५ ते ४० वर्षे असलेल्या पुरुषाचा मृतदेह आढळून आला. याची माहिती स्थानिकांनी कोतवाली पोलिसांना दिली. अप्पर पोलीस अधीक्षक सौरभ अग्रवाल, शहर उपअधीक्षक अनिल कातकडे, कोतवालीचे निरीक्षक संपत शिंदे यांनी पथकासह घटनास्थळी धाव घेतली.
या मृतदेहाच्या अंगावर पांढरे कपडे व जिन्स पॅन्ट असून त्याचे अंदाजे वय ३५ ते ४० वर्ष आहे. पोलिसांनी त्याचा मृतदेह बाहेर काढून तो शवविच्छेदनासाठी जिल्हा रुग्णालयात दाखल केला. मृतदेहाची ओळख पटलेली नाही.
