अहमदनगर- जिल्ह्यातील राहुरी तालुक्यामध्ये असणारे हाॅटेल न्यु भरत या हाॅटेलच्या रूममध्ये ओढणीच्या सहाय्याने गळफास घेऊन एका ३१ वर्षीय महिलेने आत्महत्या केल्याची धक्कादायक घटना समोर आली आहे.अनिता राजू कणसे मयत महिलेचे नाव आहे. ती पुणे शहराच्या धनकवडी परिसरामध्ये राहत होती.
या महिलेने २२ फेब्रुवारी रोजी राहुरी खुर्द ग्रामपंचायत हद्दीत असलेल्या हाॅटेल न्यु भरत या ठिकाणी दुपारी बारा च्या सुमारास एक खोली भाडोत्री घेतली होती. आज सकाळी अकरा वाजे दरम्यान साफ सफाई करणाऱ्या एका महिलेने तिच्या खोलीचा दरवाजा वाजवला मात्र आतून काही प्रतिक्रिया आली नसल्याने तिने हाॅटेल चालक विकी वैष्णवी यांना सांगितले. त्यांनी दरवाजाच्या फटीतून आत डोकावले तेव्हा ती महिला गळफास घेतलेल्या अवस्थेत दिसून आली. विकी वैष्णवी यांनी तातडीने राहुरी पोलिसांना घटनेची माहिती दिली.
राहुरी पोलिस ठाण्यातील पोलिस उप निरीक्षक निरज बोकील, हवालदार एकनाथ आव्हाड, पोलिस शिपाई भाऊसाहेब शिरसाठ यांनी घटनास्थळी धाव घेऊन पाहणी केली. पोलिसां समक्ष खोलीचा दरवाजा तोडण्यात आला. त्यावेळी सदर महिला ही छताला असलेल्या फॅनला ओढणीच्या सहाय्याने गळफास घेतलेल्या अवस्थेत होती.
तिला ताबडतोब खाली उतरून राहुरी येथील ग्रामीण रुग्णालयात नेले. वैद्यकीय अधिकाऱ्यांनी तिला उपचारापूर्वीच मयत घोषित केले. पोलिस निरीक्षक प्रताप दराडे यांच्या मार्गदर्शनाखाली सदर महिलेच्या नातेवाईकांचा शोध सुरू असून आत्महत्याचे निश्चित कारण समजले नाही. त्या महिलेने कोणत्या कारणाने आत्महत्या केली याचा तपास पोलिस करत आहेत.
