- पैठण तालुक्यातील चणकवाडी येथील घटना…
- पैठण तालुक्यातील चणकवाडी येथील सेवानिवृत्त फौजदाराच्या खात्यातून तब्बल १०.२४ लाख रुपयांची रक्कम सायबर भामट्याने लांबवल्याची खळबळजनक घटना गुरुवारी घडली.
- या बाबत सविस्तर माहिती अशी की चणकवाडी येथील सेवानिवृत्त फौजदार तुकाराम मोहिते यांचे एसबीआय बँकेत खाते असल्याने त्यांना एसबीआय बँकेचे ऑनलाइन ॲप मोबाइलमध्ये डाऊनलोड करायचे होते आणि त्यासाठी ते मोबाइलमध्ये सर्चिंग असताना त्यांना गुगलवर एसबीआय बँकेच्या हेल्पलाइन नंबर मिळाला. त्या क्रमांकावर संपर्क साधल्यावर समोरून मी एसबीआय बँकेचा अधिकारी बोलत आहे, असे सांगितले.
- तुम्हाला बँकेचे ॲप डाऊनलोड करायचे असेल तर त्यापूर्वी ‘ऐनी डेस्क’ नावाचे ॲप डाऊनलोड करा, असे मोहिते यांना सांगण्यात आले. त्यामुळे मोहिते यांनी ऐनी डेस्क ॲप डाऊनलोड केले. त्यानंतर सदर व्यक्तीने ॲप आयडी कोड विचारला. बँकेचा अधिकारीच बोलत असल्याने मोहिते यांनी कोडही सांगितला. त्यानंतर काही वेळातच त्यांच्या खात्यातील तब्बल १० लाख २४ हजारांची रक्कम सायबर भामट्याने काढून घेतली. फसवणूक झाल्याचे लक्षात येताच तुकाराम मोहिते यांनी पैठण पोलीस ठाणे गाठून फिर्याद दिली.
- प्रकरणाचे गांभीर्य लक्षात घेता गुन्हा दाखल करत असताना पोलीस निरीक्षक किशोर पवार व उपनिरीक्षक रामकृष्ण सागडे यांनी याबाबत बँकेला अवगत करून खाते सील केले. त्यामुळे मोहिते यांच्या खात्यातील दोन लाख ४५ हजार रुपयांची रक्कम वाचली.
