नगर : आपल्या दमदार अभिनयाने प्रेक्षकांची मने जिंकणारे अभिनेते विद्याधर जोशी, अभिनेत्री सुरेखा कुडची, वीणा जगताप (Veena Jagtap) आणि स्मिता गोंदकर लवकरच एका चित्रपटात झळकणार आहेत. ‘दिल दोस्ती दिवानगी’ (Dil Dosti Deewangi ) असे या चित्रपटाचे नाव आहे.
‘दिल दोस्ती दिवानगी’ या चित्रपटात मैत्री, प्रेम त्यानंतरचं आयुष्य यात अडकलेल्या प्रेमवीरांची कथा दाखवण्यात येणार आहे. या प्रेमकथेच्या प्रवासात वळणावळणावर घडणाऱ्या अनपेक्षित गोष्टी, याचा सुंदर अनुभव देणारा हा चित्रपट आहे. त्यामुळे प्रेक्षक यात नक्कीच गुंतून जातील असा विश्वास चित्रपटातील कलाकारांनी व्यक्त केला आहे.
दरम्यान ट्रान्स इंडिया मिडिया अँड एन्टरटेनमेन्टची प्रस्तुती असलेल्या ‘दिल दोस्ती दिवानगी’ चित्रपटाची निर्मिती राजेंद्र राजन यांनी केली आहे. तर दिग्दर्शन शिरीष राणे यांनी केले आहे. या चित्रपटात विद्याधर जोशी मायकेल ब्रिगेन्झा, सुरेखा कुडची मिस मेरी या कॅथलिक व्यक्तिरेखा साकारताना दिसणार आहेत. तर स्मिता गोंदकर रिया आणि वीणा जगताप श्रिया हे ग्लॅमरस पात्र साकारणार आहे.
या चौघांसोबत कश्यप परुळेकर, चिराग पाटील, अतुल कवठळकर, तीर्था मुरबाडकर, तपन आचार्य, दुर्वा साळोखे, कंवलप्रीत सिंग, प्रदीप वेलणकर, विजय पाटकर, स्मिता जयकर हे कलाकार ही चित्रपटात दिसणार आहेत. हा चित्रपट ६ ऑक्टोबरला प्रदर्शित होणार आहे.
