- अहमदनगर – राज्याचे जलसंधारणमंत्री शंकरराव गडाख यांचे सोनई परिसरातील काम पाहत असलेले स्वीय सहाय्यक राहुल राजळे यांना गोळ्या झाडून जीवे मारण्याचा प्रयत्न केला. शुक्रवारी रात्री ९.४५ वाजता नेवासा तालुक्यातील लोहगाव येथे ही घटना घडली यासंदर्भात जखमी राहुल राजळे यांचे बंधू विकास जनार्धन राजळे (वय २७) यांच्या फिर्यादीवरून नितीन शिरसाठ (रा. वांजोळी, ता. नेवासा), बबलु लोंढे, संतोष भिंगारदिवे (दोघेही रा. घोडेगाव, ता. नेवासा), ऋषिकेश वसंत शेटे (रा. सोनई, ता. नेवासा)
आणि इतर दोन ते तीन जणांविरोधात सोनई पोलिस ठाण्यात गुन्हा दाखल करण्यात आला आहे. आरोपींनी जुन्या वादातून हल्ला झाला असल्याची माहिती समजली आहे. राजळे हे सोनई येथील काम अटोपून घोडेगावमार्गे आपल्या घरी मोटारसायकलवरुन निघाले होते. राजळे लोहगाव येथील आपल्या राहत्या घराजवळ येताच पांढऱ्या रंगाच्या चारचाकी गाडीतून आलेल्या आरोपींनी राहुल राजळे यांच्यावर गोळीबार करुन जीवे मारण्याचा प्रयत्न केला. गोळीबारात राजळे यांच्या कमरेखाली एक व डाव्या पायाला एक गोळी लागली तर डाव्या हाताला एक गोळी चाटून गेली आहे. जखमी अवस्थेत स्वीय सहाय्यक राजळे यांना रात्रीच अहमदनगरच्या एका खासगी रुग्णालयात दाखल करण्यात आले असुन मध्यरात्री त्यांच्यावर शस्त्रक्रिया करण्यात आली. जिल्हा पोलीस अधीक्षक मनोज पाटील, अप्पर पोलिस अधीक्षक स्वाती भोर, शेवगाव विभागाचे पोलिस उपअधीक्षक सुदर्शन मुंढे यांच्या मार्गदर्शनाखाली सहायक पोलीस निरीक्षक तथा गुन्ह्याचे तपासी अधिकारी सचिन बागुल यांनी रात्रीच परिसरातील सर्व रस्त्यावर नाकेबंदी करुन आरोपीचा शोध सुरु केला.
