भर पावसात जयंत पाटील यांनी सभा दणाणून सोडल्यामुळे अनेकांना राष्ट्रवादीचे अध्यक्ष शरद पवार यांची आठवण झाली

पंढरपूर : सध्या पंढरपूर-मंगळवेढा पोटनिवडणुकीचा प्रचार बहरात आला आहे. भाजप तसेच राष्ट्रवादीचे बडे नेते आपापल्या उमेदवाराच्या विजयासाठी जीवाचं रान करत आहेत. राष्ट्रवादीच्या अनेक तेत्यांच्या रोज येथे सभा होत आहेत. आज (11मार्च) राष्ट्रवादीचे प्रदेशाध्यक्ष जयंत पाटील यांनी राष्ट्रवादीचे उमेदवार भगीरथ भालके यांच्या प्रचारार्थ पंढरपूर मतदारसंघात सभा घेतली. नेहमीची सभा असती तर याकडे कदाचित लोकांचे लक्षसुद्धा गेले नसते. मात्र, भर पावसात जयंत पाटील (Jayant Patil) यांनी सभा दणाणून सोडली आहे. त्यांची सभा आणि भाषण पाहून अनेकांना राष्ट्रवादीचे अध्यक्ष शरद पवार ( Sharad Pawar) यांच्या साताऱ्यातील सभेची आठवण झालीये. जयंत पाटलांच्या या सभेच्या निमित्ताने पवारांनी साताऱ्यातील सभेच्या आठवणी पुन्हा ताज्या झाल्याचे लोक सांगतायत. (Pandharpur Jayant Patil holds speech in rain people remembering Sharad Pawar speech of Satara)

पाऊस आला अन् पाटलांनी सभा दणाणून सोडली
विधानसभा निवडणुकीच्या निमित्ताने 2019 साली शरद पवार यांनी भर पावसात साताऱ्यात सभा घेतली होती. अंगावर कोसळणारा पाऊस, डोक्यावर विजांचा कडकडाट असा सगळा माहोल असताना तसूभरही विचलीत न होता पवारांनी ही सभा दाणाणून सोडली होती. 80 वर्षीय शरद पवार यांची ही सभा ऐतिसहासिक असल्याचे अजूनही सांगितले जाते. त्यांच्या याच सभेमुळे बेडे नेते सोडून गेलेले असूनसुद्धा राष्ट्रवादीने 2019 च्या विधानसभेत मोठी कामगिरी करुन दाखवली होती. त्यानंतर आता राष्ट्रवादीचे नेते भारत भालके यांच्या निधनांतनर पंढरपूर मतदारसंघाची पोटनिवडणूक होत आहे. या पार्श्वभूमीर जयंत पाटलांनीसुद्धा भर पावसात जंगी सभा घेतली आहे. जयंत पाटील सभेत भाषण करत असताना अचानक वादळी वाऱ्यासह पावसाला सुरुवात झाली. विजासुद्धा कडाडत होत्या. मात्र, डोक्यावर पावसाच्या धारा पडताना जयंत पाटीसुद्धा तिळमात्र विचलीत झाले नाहीत. त्यांनी सभेत उभं राहत आपलं भाषण पूर्ण केलं. त्यांनी सभा दणाणून सोडली.

लोकांना शरद पवारांची आठवण
जयंत पाटील यांची आजची भर पावसातली सभा पाहून अनेकांना शरद पवारांच्या 2019 मधील साताऱ्यातील सभेची आठवण झाली आहे. भर सभेत पाऊस येणे म्हणजे पवारांच्या साताऱ्याच्या सभेची पुनरावृत्ती असून हा तर शुभसंकेतच आहे, असे अनेकांनी म्हटलंय. तर काहींनी हे तर शरद पवार यांच्या पावलांवर पाऊल ठेवणं असून जलसंपदा मंत्र्याच्या अंगावर पावसाची वृष्टी होतेय असं या सभेचं वर्णन केलंय.