मुंबई- मराठी सिनेसृष्टीतील ज्येष्ठ अभिनेते रमेश देव यांचं हृदयविकाराने निधन झाले. ते ९३ वर्षांचे होते. चार दिवसांपूर्वी त्यांनी ९३ व्या वाढदिवस साजरा केला होता.
मुंबईतील धीरूभाई अंबानी रुग्णालयात त्यांनी अखेरचा श्वास घेतला. त्यांचा मुलगा आणि अभिनेता अजिंक्य देव यांनी ही माहिती दिली. रमेश देव (Ramesh Deo) यांनी मराठी तसेच हिंदी भाषेतील अनेक सिनेमांमध्ये काम केले. त्यातही पत्नी सीमा देव यांच्यासोबतचे सारेच सिनेमे हिट झाले.
रमेश देव
रमेश देव आणि सीमा देव यांनी अनेक चित्रपटांत सोबत काम केले. या दोघांचे अनेक चित्रपट चांगलेच गाजले. १९६२ मध्ये त्यांनी वरदक्षिणा या चित्रपटात सोबत काम केले. या चित्रपटावेळीच दोघांचं एकमेकांवर प्रेम जडलं.
नंतर कशाचाही उशीर न करता त्यांनी त्याच वर्षी लग्न केलं. २०१३ मध्ये या जोडीच्या लग्नाला ५० वर्षे पूर्ण झाली. यावेळीदेखील दोघांमधील प्रेम तेवढेच फुललेले दिसले होते.
या वर्षी रमेश देव आणि सीमा देव यांचे लग्नाचे ६० वे वर्षे होते. रमेश देव अखेरपर्यंत आपल्या लाडक्या पत्नीसाठी नवनव्या भेटवस्तू घ्यायचे. रमेश देव यांनी आतापर्यंत २८० पेक्षा जास्त चित्रपटांत काम केलं आहे.
रमेश देव यांनी चित्रपटसृष्टीत आपला काळ गाजवला. राजश्री प्रॉडक्शनचा ‘आरती’ हा त्यांचा पहिला हिंदी सिनेमा होता. आपल्या प्रदीर्घ कारकिर्दीत त्यांनी अमिताभ बच्चन, राजेश खन्ना, शत्रुघ्न सिन्हा यांसारख्या स्टार्ससोबत काम केले.
रमेश देव यांचा जन्म ३० जानेवारी १९२६ रोजी अमरावती येथे झाला. देव यांचे आजोबा अभियंता होते. त्यांनी राजस्थानातील जोधपूर पॅलेसच्या उभारणीत मोठं योगदान दिल्याने कोल्हापूर शहराच्या उभारणीसाठी छत्रपती शाहू महाराजांनी देव यांच्या आजोबांना निमंत्रित केलं.
त्यामुळे देव कुटुंब कोल्हापुरात स्थायिक झाले. रमेश देव यांचे वडील शाहू महाराजांचे कायदेशीर सल्लागार होते.
रमेश देव यांचे गाजलेले हिंदी सिनेमे
आज़ाद देश के गुलाम, घराना, सोने पे सुहागा, गोरा, मिस्टर इण्डिया, कुदरत का कानून, दिलजला, शेर शिवाजी, प्यार किया है प्यार करेंगे, इलज़ाम, पत्थर दिल, हम नौजवान, कर्मयुद्ध, गृहस्थी, मैं आवारा हूँ, तकदीर, श्रीमान श्रीमती, दौलत, अशान्ति, हथकड़ी, खुद्दार, दहशत, बॉम्बे ऐट नाइट, हीरालाल पन्नालाल, यही है ज़िन्दगी, फकीरा, आखिरी दांव, सुनहरा संसार, ज़मीर, एक महल हो सपनों का, सलाखें, ३६ घंटे, प्रेम नगर, गीता मेरा नाम, कोरा कागज़, कसौटी, जैसे को तैसा, ज़मीन आसमान, जोरू का गुलाम, बंसी बिरजू, यह गुलिस्ताँ हमारा, हलचल, मेरे अपने, संजोग, बनफूल, आनन्द, दर्पण, खिलौना, जीवन मृत्यु, शिकार, सरस्वतीचन्द्र, मेहरबाँन या सिनेमांमध्ये काम केलं.
