- वर्धा : लैंगिक अत्याचार, शारीरिक किंवा मानसिक शोषण अशा अनेक घटनांचं प्रमाण सध्या वाढताना दिसत आहे. काही महिन्यांपूर्वी गर्भपाताचा गुन्हा देखील महाराष्ट्रात बनला होता. हल्लीही अशा अनेक घटना उघडकीस येताना दिसत आहेत. अशातच वर्धा जिल्ह्यात सध्या अल्पवयीन मुलीचे लैंगिक शोषण करुन तिचा अवैधरित्या गर्भपात केल्याचं प्रकरण गाजत आहे.
- महत्वाचं म्हणजे ज्या नामांकित रुग्णालयात 13 वर्षांच्या मुलीचा गर्भपात करण्यात आला, त्या इमारतीच्या मागे असलेल्या गोबर गॅसच्या टाकीत अतिशय धक्कादायक प्रकार उघडकीस आला आहे. तब्बल 11 कवट्या आणि 54 हाडं असे अवशेष या ठिकाणी सापडल्यामुळे एकच खळबळ उडाली आहे. या प्रकरणात अल्पवयीन मुलीचे लैंगिक शोषण करणाऱ्या अल्पवयीन मुलाच्या आई वडिलांसह महिला डॉक्टरला आधीच अटक करण्यात आली होती. आता डॉक्टर रेखा कदम यांच्या सासू आणि तेथील परिचारिकेलाही ताब्यात घेतले आहे. सदर पीडितेचा 30 हजार रुपयांत अवैधरित्या गर्भपात केल्याचा आरोप डॉ. रेखा कदम यांच्यावर आहे. मात्र डॉ. कदम यांनी यापूर्वीही अनेक गैरप्रकार केल्याची चर्चा खरी ठरण्याची भीती व्यक्त होत आहे.
- आर्वी पोलिसांनी महिला डॉक्टरसह तिघांनाही बेड्या ठोकल्या आहेत. त्यांना न्यायालयात हजर केलं असता अल्पवयीन मुलाच्या आई आणि वडिलांची कारागृहात रवानगी करण्यात आली, तर डॉ. रेखा कदम यांच्या पोलीस कोठडीत वाढ करण्यात आली होती.
- नेमकं काय आहे प्रकरण?
- मिळालेल्या माहितीनुसार, सहा जानेवारीला अल्पवयीन मुलीचा गर्भपात करण्यात आला होता. मुळात गर्भपातासाठी लागणारा परवाना डॉ. रेखा कदम यांच्याकडे आहे का, असा प्रश्न उपस्थित झाला आहे. महत्त्वाचं म्हणजे मुलगी अल्पवयीन असल्यामुळे गर्भपाताआधी पोलिसांना कळवणं आवश्यक होतं, मात्र तशी कुठलीही पूर्वकल्पना न देता अवैधरित्या तिचा गर्भपात केल्याचं उघड झालं आहे. रुग्णालयाच्या इमारतीच्या पाठीमागे असलेल्या गोबर गॅस टाकीत 11 कवट्या आणि 54 हाडं असं बायोमेडिकल वेस्ट सापडल्याने याआधी इथे आणखी अवैध प्रकार घडल्याचा संशय बळावला आहे.
- डॉक्टरांची सासू आणि नर्सही ताब्यात
- पोलिसांनी उपजिल्हा रुग्णालयाचे वैद्यकीय अधिकारी पथक आणि पालिका पथकाला पाचारण करुन डॉ. रेखा कदम यांच्या रुग्णालयामागील परिसरात खोदकाम केले असता जमिनीत पुरलेले भ्रुण अवषेशांसह आढळून आले आहेत. या प्रकरणी आता रुग्णालयाची परिचारिका संगीता काळे आणि डॉक्टरांची सासू शैलजा कदम यांना सुद्धा ताब्यात घेण्यात आले आहे.
- रुग्णालयामागील खड्डा बायोगॅस प्रकल्पाचा होता. मात्र, तो वापरात नसल्याने या खड्ड्यात इतर वेस्टेज साहित्य टाकले जात होते. पंचांसमक्ष अनेक बाबी जप्त केले आहेत. शिवाय जप्त करण्यात आलेले अवशेष डीएनए टेस्टसाठी पाठवण्यात येणार आहेत. तसेच हाडांचे अवशेष जनावरांचे की माणसांचे ही बाब अहवाल प्राप्त झाल्यावरच कळेल.
- नेमकं काय घडलं होतं?
- वर्धा जिल्ह्यातील आर्वी शहरात राहणाऱ्या संबंधित अल्पवयीन मुलीवर तिच्याच शेजारी राहणाऱ्या अल्पवयीन मुलाने बळजबरीने शारिरीक संबंध प्रस्थापित केले. यातून ती अल्पवयीन मुलगी गरोदर राहिली. मुलीच्या पोटात अचानक दुखू लागल्याने तिचे आई वडील तिला डॉक्टरकडे घेऊन गेले असता ही बाब उघडकीस आली.
- वाचा हेही –धक्कादायक! ओमायक्रॉनच्या भीतीने इतकं ‘क्रूर लॉकडाउन’! गर्भवती महिला, लहान मुलं लोखंडी बॉक्समध्ये कैद
- मुलगी गरोदर असल्याचे कळताच अल्पवयीन आरोपी आणि त्याच्या आई वडिलांनी मुलीच्या आई वडिलांना गर्भपात करण्यास सांगितले. तसेच याची पोलिसांकडे वाच्यता केल्यास सर्व गावात बदनामी करु असे धमकावले. मुलगी केवळ 13 वर्षाची असून मुलीची आणि आपली बदनामी होऊ नये म्हणून मुलीच्या आई वडिलांनीही त्यांचे म्हणणे ऐकले. त्यानुसार स्त्री रोग तज्ज्ञ डॉ. रेखा कदम यांच्या दवाखान्यात मुलीचा बेकायदेशीररित्या गर्भपात करण्यात आला. यासाठी मुलाच्या घरच्यांनी 30 हजार रुपये दिले.
