Qutub Minar Case: कुतुबमिनारच्या परिसरात हिंदूंना पूजेचा अधिकार मिळावा अशी मागणी करणाऱ्या याचिकेवर दिल्लीतील साकेत कोर्ट 9 जून रोजी आपला निकाल सुनावणार आहे. आज झालेल्या सुनावणीत हिंदू पक्षाने आणि आर्किओलॉजी सर्व्हे ऑफ इंडियाने (ASI) आपली बाजू मांडली. मंदिर उद्धवस्त करून Quwwatul Islam मशीद उभारण्यात आली. त्यामुळे तिथं हिंदूना पूजा करण्याचा अधिकार देण्यात यावा अशी मागणी करण्यात आली. तर, 800 वर्षांपासून जर तिथे देव कोणत्याही पूजेशिवाय असेल तर त्यांना असेही ठेवता येऊ शकते अशी टिप्पणी कोर्टाने केली.
ASI ने आपली बाजू मांडताना कोर्टात सांगितले की, कुतुबमिनारमध्ये धार्मिक कार्यक्रमाचे आयोजन करता येऊ शकत नाही. त्या ठिकाणी स्मारक आहे. तर, दुसरीकडे हिंदू पक्षाच्यावतीने हरिशंकर जैन यांनी सांगितले की, 27 मंदिरे उद्धवस्त करून कुव्वत उल इस्लाम ही मशीद उभारण्यात आल्याचे पुरावे आहेत. त्यामुळे या ठिकाणी पूजा करण्यास परवानगी द्यावी. या दरम्यान हिंदू पक्षाने अयोध्या प्रकरणाचा दाखल दिला होता. कुतुब मीनार परिसरात हिंदू देवी देवतांच्या अनेक मूर्ती आहेत. याशिवाय कुतुबमिनार परिसरात अशी अनेक ठिकाणं आहेत, जिथे कलश, स्वस्तिक आणि कमळ यांसारखी प्रतिकं दिसतात, ज्यावरुन ही इमारतमधील हिंदूंचं अस्तित्त्व अधोरेखित करते असा मुद्दा ही उपस्थित करता आला होता.
कोर्टात ASI च्या वकिलांनी सांगितले की, या स्मारकाचा दर्जा 1958 चा कायदा आणि त्यापूर्वीच्या 1904 च्या कायद्यानुसार निश्चित करण्यात आले होते. ASI ने दिवाणी कोर्टाच्या आदेशाचा हवाला देत म्हटले की, या प्रकरणात पूजा करण्याचा अधिकार मूलभूत अधिकार नाही. त्यामुळे कोर्टाने हिंदू पक्षाची याचिका फेटाळण्याची मागणी करण्यात आली.
