कॅन्टोन्मेंट हद्दीत अहमदनगर कँन्टोन्मेंट बोर्डाच्या मालकीचा प्रवेश पथकर नाका आहे. तसे अनेक ठिकाणी हे नाके आहेत. मात्र नगर – सोलापूर रोडवर टोल चुकवून भरधाव वेगात वाहन चालविण्याच्या घटना सातत्यानं घडत असतात.असाच एक प्रकार भिंगार कँप पोलिसांच्यालक्षात आला आणि अवघे साठ रुपये कर चुकवून धूम ठोकून पळण्याचा प्रयत्न करणार्या एका वाहन चालकाला या पोलिसांनी तब्बल एक हजार रुपयांचा दंड ठोकला.
या दंडात्मक कारवाईचा संबंधित वाहन चालकांनी चांगलाच धसका घेतला असून यामुळे मोठी खळबळ उडालीय.नगर मधून सोलापूर, जामखेड व पाथर्डी रस्त्यावर सतत प्रचंड अशी वर्दळ असते. परप्रांतियांच्या अवजड वाहनांसह जीप, एसटी, टेम्पो, डंपर्स, टँकर आदींसह दुचाकी वाहनांची या रस्त्याने नेहमी ये – जा असते.
कँन्टोन्मेंट बोर्डाच्या नाक्यावर अवघ्या साठ रुपयांच्या प्रवेश कराची पावती फाडण्याऐवजी वाहन चालक भरधाव वेगाने वाहनं दामटवून धूम ठोकतात. परंतू अशावेळी अपघात होऊन जिवित किंवा वित्तहानी होऊ शकते.यापूर्वी अशा डंपर्स आणि टँकर्सच्या धडकेनं अनेकांचे प्राण गेलेले आहेत. दुर्दैवानं हे वाहन चालक मागील अनुभवाचा किंवा घडलेल्या घटनांचा अजिबात गांभिर्यानं विचार करत नाहीत.
परिणामी या रस्त्यावर अपघातांच्या दुर्घटना थांबायचं नाव घेत नाहीत. वाहन चालकांच्या मुजोर प्रवृृृृृत्तीमुळे निष्पाप लोकांचे मात्र हकनाक जीव जात आहेत.असाच एक वाहन चालक साठ रुपयांचा कर चुकवून धूमस्टाईल जात असल्याचं भिंगार कँप पोलीस ठाण्याचे कर्मचारी रेवणनाथ दहिफळे यांच्या निदर्शनास आलं. त्यांनी वाहनाचा लांबपर्यंत पाठलाग केला, ते वाहन अडवलं आणि सदर वाहन चालकाला त्यानं केलेल्या बेफिकीरीबद्दल त्याच्याविरुध्द एक हजार रुपये दंडाची कारवाई केली.
