दिवंगत आमदार आणि अहिल्यानगर जिल्हा मध्यवर्ती सहकारी बँकेचे अध्यक्ष शिवाजी कर्डीले यांच्या निधनानंतर त्यांचे चिरंजीव अक्षय यांना कोणते पद दिले जाणार? याकडे लक्ष लागले होते. आज त्यांची बँकेच्या संचालकपदी बिनविरोध निवड करण्यात आली. कर्डीले यांच्या निधनामुळे रिक्त झालेल्या अध्यक्षपदी माजी आमदार चंद्रशेखर घुले यांची आधीच बिनविरोध निवड झाली. आता संचालकपदी अक्षय यांची निवड झाली. बँकेतील संचालक मंडळाच्या आज (२९नोव्हेंबर) झालेल्या बैठकीत हा निर्णय घेण्यात आला.
अक्षय यांना जिल्हा परिषद निवडणुकीत उमेदवारी दिली जाईल का? पुढे होणाऱ्या राहुरी विधानसभा मतदार संघातील पोट निवडणुकीत उमेदवारी दिली जाईल का? की बँकेत संचालक केले जाईल. अशा चर्चा आधीपासूनच सुरू होत्या. पक्षाच्या अनेक वरिष्ठ नेत्यांबी अक्षय यांना योग्य संधी देण्याचे भाष्य केले होते. अखेर आज त्यांना बँकेचे संचालकपद मिळाले. अर्थात या पदाची मुदत काही महिनेच आहे. त्यामुळे आपल्या वडिलांचा राजकीय वारसा चालविण्यासाठी आणि त्यांच्याप्रमाणे संधी आणि पदे खेचून आणण्यासाठी अक्षय किती प्रयत्न करतात, कसे काम करतात, त्यांना कशी साथ मिळते, हे लवकरच कळेल.
