डॉक्टरांनी मिळून नगर अर्बन बँकेत घोटाळा केला कोतवाली पोलीस ठाण्यात गुन्हा दाखल झाला

अहमदनगर हॉस्पीटलसाठी मशिनरी खरेदीस कर्ज घेऊन कोणत्याही प्रकारची मशिनरी खरेदी न करता स्वत:च्या फायद्यासाठी रक्कम वापरून नगर अर्बन बँकेची 22 कोटी 90 लाख रुपयांची फसवणूक केल्या प्रकरणी सात जणांविरुद्ध कोतवाली पोलिस ठाण्यामध्ये फसवणुकीचा गुन्हा दाखल करण्यात आला आहे. गुन्हा दाखल झालेल्यांमध्ये डॉक्टरांसह मशिनरी पुरविणार्‍या संस्थांचा समावेश आहे. याच हॉस्पीटलचे अन्य बँकेतील कर्ज प्रकरणेही वादग्रस्त ठरलेली आहेत. आरोपींमध्ये डॉ. विनोद श्रीखंडे, डॉ. रवींद्र कवडे, डॉ. भास्कर सिनारे, डॉ. निलेश शेळके, गिरीश अग्रवाल, निर्मल एजन्सी, स्पंदन मेडीकेअर (पुणे) यांचा समावेश आहे.नगर अर्बन बँकेमध्ये डॉक्टरांनी एकमेकांना जामीन राहून रुग्णालयासाठी नवीन मशिनरी खरेदी करायची, असे सांगून पुण्याच्या स्पंदन मेडिकेअर तसेच निर्मल एजन्सी यांच्याशी संगनमत करून नगर अर्बन बँकेमध्ये 22 कोटी 90 लाख रुपयांचे कर्ज घेतले होते. हे कर्ज बँकेने केडगाव व मार्केट शाखेतून त्यांना उपलब्ध करून देण्यात आलेले आहे. या कर्जाचे हप्ते थकलेले आहेत. बँकेने वसुलीसाठी तगादा सुरु केला होता. या प्रकरणाच्या तपासामध्ये अनेक गंभीर बाबी पुढे आल्या होत्या. संबंधित एजन्सीने कोणत्याच प्रकारची मशनरी घेतली नाही व रुग्णालयात ती आलेली नाही, हे यातून प्रामुख्याने उघड झाले. या घटनेमध्ये डॉक्टर व इतर एकमेकांना जामीन राहिले होते. मशिनरी खरेदी न करता निर्मल व स्पंदन मेडिकेअर यांच्या बरोबर संगनमत करत डीलरच्या खात्यातून परस्पर पैशांची विल्हेवाट लावल्याचे निदर्शनास आले. कर्जाची दिलेली रक्कम थेट रोहिणी सिनारे व उज्वला कवडे यांच्या खात्यामध्ये जमा करून सर्वांनी परस्पर विल्हेवाट लावल्याचेही समोर आल्याचे बँकेचे व्यवस्थापक महादेव साळवे यांनी फिर्यादीत म्हटले आहे. कोतवाली पोलिस ठाण्यात सात जणांविरुद्ध फसवणुकीचा तसेच कलम 34 प्रमाणे गुन्हा दाखल करण्यात आला आहे. पुढील तपास सहाय्यक पोलीस निरीक्षक मनोज महाजन करत आहेत.