जन आधार सामाजिक संघटनेच्या वतीने
उत्तर प्रदेश येथील,तरुणीवर झालेल्या सामूहिक बलात्कार व हत्येचा निषेध
आरोपींना फाशीची शिक्षा देण्याची मागणी
अहमदनगर (प्रतिनिधी)- उत्तर प्रदेशातील हाथरस मध्ये राहणाऱ्या तरुणीवर झालेल्या सामूहिक बलात्काराच्या घटनेचा जन आधार सामाजिक संघटनेच्या वतीने जिल्हाधिकारी कार्यालयासमोर निषेध नोंदविण्यात आला. तर सदर प्रकरणाचा तपास सीबीआयकडे सोपविण्यात यावा, माणुसकीला काळिमा फासणार्‍या या प्रकरणाची सुनावणी फास्ट ट्रॅक कोर्टात होऊन आरोपींना फाशीची शिक्षा देण्याची मागणी करण्यात आली आहे. यावेळी संघटनेचे संस्थापक अध्यक्ष प्रकाश पोटे, अमित गांधी, वजीर सय्यद, गणेश निमसे, संतोष उदमले, शाहनवाझ शेख, अजय सोळंकी, बाळासाहेब केदारे, सुशिल साळवे, संतोष त्रिंबके, मयुर रोकडे, हरीभाऊ वाकचौरे, बाळासाहेब थोटे, सनी भोसले, कैलास मोरे, मुकेश हस, शाहबाज शेख, बाळासाहेब उद्मले आदि उपस्थित होते.
उत्तर प्रदेशातील हाथरस जिल्ह्यातील चंदपा येथे राहणार्‍या तरुणीवर सामूहिक बलात्काराची घटना घडली. आपल्या आईसोबत तरुणी शेतात चारा गोळा करण्यासाठी गेली असता तिच्यावर चार नराधमांनी अत्याचार करून तिची जीभ कापून, पाठीच्या कण्याचे हाड मोडून जीवे मारण्याचा प्रयत्न केला. पीडित तरुणीला उपचारासाठी अलीगढच्या जेएन मेडिकल रुग्णालय व सफदरजंग रुग्णालयात उपचार करण्यात आले. मात्र उपचार सुरु असताना या पीडित तरुणीची प्राणज्योत माळवली. या घटनेची माहिती मिळून देखील उत्तरप्रदेश पोलिसांनी गुन्हा दाखल केलेला नव्हता. यापुढे जाऊन पोलिसांनी पीडितेचा मृतदेहावर त्यांच्या नातेवाईकांना न सांगता गुपचूप त्यावर अंत्यसंस्कार केले. उत्तर प्रदेश पोलीसांनी हे प्रकरण दडपण्यासाठी केलेला प्रकार व या घटनेचा निषेध करीत असल्याचे निवेदनात म्हंटले आहे. या प्रकरणाचा सीबीआयकडे सोपवण्यात यावा, सदर प्रकरण फास्ट ट्रॅक कोर्टात चालवून आरोपींना फाशीची शिक्षा देण्यात यावी, पिडीत कुटुंबीयांना भरीव आर्थिक मदत देण्याची मागणी जन आधार सामाजिक संघटनेच्या वतीने करण्यात आली आहे. प्रतिनिधि फारुख शेख
