अर्बन बँकेच्या शेवगाव शाखेतील
अहमदनगर: आर्थिक गैरव्यवहारामुळे चर्चेत असलेल्या नगर अर्बन बँकेच्या शेवगाव शाखेतील व्यवस्थापक गोरक्षनाथ सूर्यभान शिंदे (वय ५८रा. भातकुडगाव ता. शेवगाव) यांनी विष घेऊन आत्महत्या केल्याने खळबळ उडाली आहे. मंगळवारी दुपारी ३ वाजता ही घटना घडली.
याप्रकरणी शेवगाव पोलीस ठाण्यात आकस्मात मृत्यूची नोंद करण्यात आली आहे. शिंदे हे मंगळवारी दुपारी भातकुडगाव येथील त्यांच्या शेतात बेशुद्ध अवस्थेत कुटुंबियांना आढळून आले. त्यांना तत्काळ शेवगाव येथील ग्रामीण रुग्णालयात दाखल केले मात्र उपचारापूर्वीच त्यांचा मृत्यू झाला होता.
याप्रकरणी मयत शिंदे यांचे चुलत भाऊ कचरू शिंदे यांनी याबाबत शेवगाव पोलीस ठाण्यात दिलेल्या खबरीवरून आकस्मात मृत्यूची नोंद करण्यात आली आहे. दरम्यान शिंदे यांनी आत्महत्येपूर्वी चिठ्ठी लिहून ठेवल्याची चर्चा आहे. याला मात्र पोलिसांनी दुजोरा दिला नाही.
अर्बन बँकेच्या शेवगाव शाखेतील सोनेतारण अपहार नुकताच चव्हाट्यावर आला आहे. कर्जदारांनी बँकेत गहाण ठेवलेले सोने संशयास्पद असून त्याची चौकशी करावी असे पत्र गोरक्षनाथ शिंदे यांनी २०१८ मध्ये बँकेचे संचालक व वरिष्ठ अधिकाऱ्यांना दिले होते. या पत्रावर मात्र काहीच कार्यवाही झाली नाही. याच तणावातून शिंदे यांनी आत्महत्या केल्याची चर्चा आहे.
आत्महत्या करण्यापूर्वी शिंदे यांनी लिहली चिठ्ठी
आत्महत्येपूर्वी गोरक्षनाथ शिंदे यांनी लिहिलेल्या चिठ्ठीमध्ये काय मचकूर आहे, ते समजू शकलेले नाही. मात्र, अर्बन बँकेत झालेल्या सोने तारण घोटाळ्याबाबत त्यांनी काही खुलासा केला आहे का ? की त्यांनी आत्महत्या करण्यामागचं कारण लिहलं असेल ? असे प्रश्न विचारले जात आहेत. तसेच याव्यतिरिक्त इतर तर्कवितर्कांना सध्या उधाण आले आहे.
शेवगाव पोलीस ठाण्यात अकस्मात मृत्यूची नोंद
दरम्यान, शिंदे यांनी आत्महत्या केल्यानंतर एकच खळबळ उडाली आहे. याबाबत येथील पोलिसांना सविस्तर माहिती विचारण्याचा प्रयत्न करण्यात आला. मात्र, पोलिसांनी या प्रकरणाबाबत अजूनतरी मौन बाळगले आहे. येत्या काही दिवसांत शिंदे यांच्या आत्महत्येचे नेमके कारण स्पष्ट होण्याची शक्यता आहे. सध्यातरी या आत्महत्येची शेवगाव पोलीस ठाण्यात अकस्मात मृत्यूची नोंद करण्यात आली आहे.
