पाथर्डी – गावठी पिस्तूल व चाकूचा धाक दाखवत पाच ते सहा चोरट्यांनी नाशिक येथील भाविकांचे ९ तोळे सोन्याचे दागिने व रोख रक्कम लुटली. ही घटना पाथर्डी तालुक्यात शुक्रवारी रात्री १० वाजेच्या सुमारास खांडगावजवळील आश्रम शाळेजवळ घडली.
याप्रकरणी पाथर्डी पोलिस ठाण्यात गुन्हा दाखल करण्यात आला. नाशिक जिल्ह्यातील पवन सुखदेव खैरनार (३६ रा. साईकृपा अपार्टमेंट, जेलरोड, ना शिक) यांनी पाथर्डी पोलिस ठाण्यात फिर्याद दिली. यात म्हटले आहे की, पवन व त्यांचा भाऊ अमोल खैरनार लहान मुलांच्या कुटुंबासह टेम्पो ट्रॅव्हलने (एमएच १४ बीए ९९९७) २८ ऑक्टोबरला तुळजापुर, अक्कलकोट, पं ढरपुर, कोल्हापुर, जेजुरी देवस्थानला गेले होते. ३१ ऑक्टोबर रोजी सायंकाळी ६ वाजता मढी येथे देवदर्शनासाठी गेले.
परतीच्या मार्गावर ९ वाजता त्रिभुवनवाडी, कौडगाव, जोहारवाडी रस्त्याने जात असताना खांडगाव येथील आश्रमशाळेजवळ पाठीमागून येत काही जणांनी पांढऱ्या रंगाची स्विफ्ट कार त्यांच्या टेम्पो ट्रॅव्हलसमोर लावली. त्यातून पाच ते सहा जण लोखंडी रॉड, लाकडी दांडके घेऊन खाली उतरले, एकाने माझ्या डोक्याला गावठी पिस्तुल लावून पवन यांना जिवे मारण्याची धमकी दिली. गाडीत असणाऱ्या कुटुंबातील महिलांच्या अंगावरील कर्णफुले, गंठण, अंगठी असा सुमारे पाऊणे नऊ तोळे सोन्याचे दागिने व रोख १६ हजार ५०० रुपये असा ऐवज बळजबरीने काढून घेतले.
घटनास्थळाकडे धाव घेतली. स्थानिक लोक घटनास्थळाकडे येत असल्याचे पहाताच चोरटे पसार झाले. पाथर्डी पोलिस ठाण्यात गुन्हा दाखल करण्यात आला. पुढील तपास पाथर्डी पोलिस करत आहेत.
दरम्यान, तीन दिवसांपूर्वी करंजी घाटाजवळ अज्ञात चोरट्यांनी दिपिका बापू पालवे या महिलेच्या गळ्यातील १३ ग्रॅम सोन्याचे गंठण पळवले होते. तीन, चार दिवसापूर्वी करंजीजवळ गटाचे पैसे गोळा करणाऱ्या एका व्यक्तीस अज्ञात चोरट्यांनी भरदुपारी मारहाण करुन त्याच्याजवळील पैशाची पिशवी हिसकावून नेली होती. मात्र, अशा घटनांचा तपास लागत नसल्याने पोलिसांविषयी नाराजीचे वातावरण आहे.
पोलिस अधीक्षकांची घटनास्थळी भेट
घटनेचे गांभीर्य लक्षात घेता पोलीस अधीक्षक सोमनाथ घार्गे, अतिरिक्त अधीक्षक वैभव कलबुर्गे, उपविभागीय अधिकारी नीरज राजगुरू व स्थानिक गुन्हे शाखेचे निरीक्षक किरणकुमार कबाडी हे स्वतः घटनास्थळी दाखल झाले. त्यांनी तपासाची चक्रे फिरवली. घटनास्थळावरून पोलिसांनी गुन्ह्यात वापरलेली स्विफ्ट कार, दोन दुचाकी जप्त केल्या असून काही संशयित दुचाकी जप्त केल्या असून काही संशयित आरोपींना ताब्यात घेतल्याची माहिती समोर येत आहे.
