Weather Alert Maharashtra : राज्यभर सध्या हवामानाचे चित्र अष्टपैलू दिसत आहे. काही ठिकाणी उन्हाच्या झळा तर काही भागांत अचानक बरसणाऱ्या सरी, अशा स्थितीत आज १८ जुलै रोजी अनेक जिल्ह्यांमध्ये जोरदार पावसाचा इशारा हवामान खात्याने दिला आहे. विशेषतः कोकण, दक्षिण महाराष्ट्र, मराठवाडा आणि काही विदर्भातील भागांमध्ये विजांच्या कडकडाटासह पावसाचा अंदाज वर्तवण्यात आला आहे. परिणामी या भागांतील शेतकरी आणि नागरिकांनी सतर्क राहण्याचे आवाहन करण्यात आले आहे.
हवामानातील या बदलाचे मुख्य कारण म्हणजे उत्तर प्रदेश आणि त्याच्या आसपास तीव्र कमी दाबाचे क्षेत्र सक्रिय झाले असून ते मध्यप्रदेशकडे सरकत आहे. यामुळे महाराष्ट्राच्या दक्षिणेकडील भागात दमदार पावसाचा प्रभाव जाणवण्याची शक्यता आहे. याशिवाय बंगालच्या उपसागरापर्यंत कमी दाबाचा पट्टा कार्यरत असल्याचेही हवामान विभागाने स्पष्ट केले आहे.
राज्यातील इतर भागांमध्ये सुद्धा हलक्या ते मध्यम स्वरूपाच्या सरी कोसळण्याची शक्यता नाकारता येत नाही. मात्र प्रमुख पावसाचा फोकस आज दक्षिण कोकण, मध्य महाराष्ट्र, मराठवाडा आणि विदर्भातील काही जिल्ह्यांवर राहणार आहे.
