अहमदनगर-सोलापूर रस्त्यावर भीषण अपघात घडला आहे. अहमदनगर-सोलापूर रस्त्यावर कोकणगाव गावच्या शिवारात बोराडे वस्ती जवळ चार वाहनांमध्ये भीषण अपघात झाला आहे. या विचित्र अपघातात दोघांचा मृत्यू तर 10 जण गंभीर जखमी झाले आहेत. अपघातांमध्ये मालवाहतूक ट्रक हा सोलापूर कडून अहमदनगरकडे जात होता, तर इतर तीन वाहने तीन चाकी अॅपे रिक्षा, क्रुझर कंपनीची जीप आणि टू व्हिलर गाडी ही मिरजगावच्या दिशेने सोलापूरकडे जात होते.या अपघातात कृष्णा मल्हारी बोरुडे आणि सोपान दिनकर काळे या दोघांचा मृत्यू झाला आहे.तर इतर दहा जण गंभीररीत्या जखमी झाले आहेत सर्वांना नगर येथे उपचारासाठी हलविण्यात आले आहे.अहमदनगर- सोलापूर महामार्गावरील कोकणगाव शिवारात काल रात्री 11 वाजेच्या सुमारास हा अपघात झाला. जखमींची नावे अद्याप समजू शकलेली नाही. दरम्यान जखमींमध्ये तीन लहान मुलांचा समावेश आहे. आठ जखमींवर जिल्हा शासकीय रुग्णालयात तर सात जणांवर खासगी रूग्णालयात उपचार सुरू आहेत. याबाबत कर्जत पोलिसात अपघाताची नोंद करण्यात आली आहे.हा अपघात नेमका कशामुळे झाला याबाबत कर्जत पोलीस तपास करत असल्याचे कर्जत पोलीस ठाण्याचे पोलीस निरीक्षक चंद्रशेखर यादव यांनी सांगितले आहे.
