जिल्हा परिषदेचे माजी उपाध्यक्ष सुजित झावरे व सचिन वराळ यांना जामीन मंजूर
अहमदनगर : जिल्हा परिषदेचे माजी उपाध्यक्ष सुजित झावरे पाटील व निघोजचे ग्रामपंचायत सदस्य सचिन पाटील वराळ यांना जिल्हा न्यायालयात अटकपूर्व जामीन मंजूर करण्यात आला आहे.
गेल्या आठवड्यात पारनेरच्या तहसीलदार ज्योती देवरे यांच्या तक्रारीवरून जिल्हा परिषदेचे माजी उपाध्यक्ष सुजित झावरे पाटील यांच्यावर खंडणी, विनयभंग व सरकारी कामात अडथळा आणल्याप्रकरणी पारनेर पोलिसांत गुन्हा दाखल करण्यात आला होता. याप्रकरणी झावरे यांना पोलिसांनी ताब्यात घेतले होते. झावरे यांच्यावर गुन्हा दाखल करण्यात आल्यानंतर पारनेरमध्ये आरोप प्रत्यारोपांच्या फैरीही झडल्या. दरम्यान सोमवारी सुजित झावरे यांना जामीन मंजूर झाला आहे.
पठारवाडी येथील किरण उर्फ अक्षय लहू पवार याला ग्रामपंचायत सदस्य सचिन मच्छिंद्र वराळ यांनी जीवे मारण्याची धमकी व दमदाटी केल्याच्या त्रासाला कंटाळून आत्महत्या केल्याबाबतची फिर्याद मयत अक्षयच्या नातेवाईकांनी दिली होती. त्यावरुन वराळ यांच्यावर गुन्हा दखल करण्यात आला होता. या प्रकरणात सचिन पाटील वराळ यांना जिल्हा न्यायालयात जामीन मंजूर करण्यात आला आहे. या दोन्ही प्रकरणात अ‍ॅड. महेश तवले यांनी बाजू मांडली. त्यांना अ‍ॅड. संकेत ठाणगे यांनी मदत केली.
