श्रेया मंगल कार्यालय येथे हा भूमिपूजन सोहळा संपन्न होणार आहे.
श्रेया मंगल कार्यालय सोनेवाडी रोड केडगाव अहमदनगर.
अहमदनगर,दि.३० सप्टेंबर,(प्रतिनिधी) – नगरमध्ये होणाऱ्या एका कार्यक्रमात गडकरी आणि राष्ट्रवादीचे ज्येष्ठ नेते शरद पवार एका व्यासपीठावर येत आहेत. राष्ट्रीय रस्ते विकास प्राधिकरण आणि स्थानिक भाजप शाखेच्या वतीने आयोजित या कार्यक्रमाला पवार यांना बोलविण्याची सूचना स्वत: गडकरी यांनीच केल्याचे सांगण्यात आले. नगर जिल्ह्यातील विविध चार महामार्गांचे भूमिपूजन आणि चार महामार्गांचे लोकार्पण दिनांक २ ऑक्टोबरला करण्यात येणार आहे. नगर शहराजवळ केडगाव परिसरात शनिवारी सकाळी १० वाजता हा कार्यक्रम होणार आहे. यासाठी राष्ट्रवादीचे पक्षाध्यक्ष शरद पवार आणि केंद्रीय मंत्री नितिन गडकरी एकत्र येत आहेत. नगर शहर भाजपचे जिल्हाध्यक्ष महेंद्र गंधे यांनी यासंबंधीची माहिती दिली.याबाबत गंधे म्हणाले, सुमारे चार हजार कोटी रुपये खर्चांची महामार्गांची कामे मंजूर झालेली आहेत. त्यांचे भूमिपूजन या दिवशी होणार आहे. यामध्ये नगर-करमाळा हा महामार्गा चार पदरी होणार आहे. त्यासाठी सुमारे दोन हजार कोटी रुपयांचा खर्च होणार आहे. सावळीविहिर ते नगर बायपास रुंदीकरण, नगर-भिंगार रस्ता रुंदीकरण यासह राष्ट्रीय राखीव निधीतून दुरूस्तीच्या कामाचे भूमिपूजन यावेळी करण्यात येणार आहे.याशिवाय नगर-दौंड, नगर- कडा- जामखेड, कोपरगाव वैजापूर अशा काम पूर्ण झालेल्या रस्त्यांचे औपचारिक उदघाटनही यावेळी करण्यात येणार आहे. या वेळी पालकमंत्री हसन मुश्रीफ, खासदार डॉ. सुजय विखे, खासदार सदाशिव लोखंडे यांच्यासह आमदार आणि अन्य लोकप्रतिनिधीही उपस्थित राहणार आहेत, असेही गंधे यांनी सांगितले. यावेळी भाजपचे पदाधिकारी सुनील रामदासी, सचिन पारखी, संतोष गांधी, नरेंद्र कुलकर्णी, विवेक नाईक उपस्थित होते.
